بيني وبينه ماوقف غير الاداب

اسباب لانه ماش شي بلا اسباب***هاك الغزال الي ذبحني بزينه

مر ايتخطى ويتلف لف بالاسلاب ***وطير عن القلب المشقى يقينه

من نضرته وقع على القلب مظراب***اشد من وقع الرماح السنينه

يسرق نضر عينه حذر مدري اعجاب***وانا منه قلبي تقطع وتينه

عرض ومن تعريضته خافقي ذاب***وقمت اتبعه ماغير عيني بعينه

واقفى عجل من نضرتي فيه مرتاب***ويحط طول الناس بيني وبينه

وصديت عنه وخاطري منه ماطاب***كني مني يمه وانا اقول وينه

من خوف يفطن لي وننشب بالانشاب***السوق زحمه والاوادم ذهينه

واخذت عنه اشوي مقفى والاعصاب***متوتره مافكرت بتهوينه

ولديت واليا انه يسعر باالاطياب***عند الهنود الي لغتهم رطينه

وارسلت يمه نضرت احباب لحباب***النضره الي ماتركت لي غبينه

واقبل يباه يحطني عنه مجناب***وشكيت في ممشاه على هوينه

ناضرت فيه وضاحك الناب للناب***ومن ضحكته حلت علي السكينه

موه على اهل السوق واشر بالاهداب***اشاره تبغى قلوب فطينه

منها فهمت انه يبى يعود لو غاب***وان الامر ماعاد هو في يدينه

وعقب غلاق اسبوع مر ومعه جاب*** اصغيرا متجود في يمينه

اصغيرا بالزين للعقل نهاب***يقول اخوي ومقصده فاهمينه

قصده يقول ان كان استعاب***علي من هذا ملامح وعينه

واخذت انا واياه مزح وتعجاب***عقله رزين وكل كلمه رزينه

في موقع عنه المخاليق غياب***الا ملايكة العمل حاضرينه

بيني وبينه ماوقف غير الاداب***اداب سلم كلنا وارثينه

منها احترام اشعور عربين الانساب***ومنها احترام الرجل نفسه ودينه

وبغى الوكاد وقلت هايم ومنصاب***حبك ذلحني نعنبو والدينه

قال استميحك عذر واقول للعاب***وش هالغرام الى غدىابك بحينه

وحلفت له واقسمت في رب الارباب***منقذ من الطوفان راع السفينه

اني معك صادق ولاني بكذاب*** والكاذب الله لايطول سنينه

قال انت صادق مير سابقك خطاب***واهلي في تال الشهر موعدينه

كمله وهو ماغير ذهاب واياب***لاهم براضينه ولا رافضينه

وان كانها تمت على ايدين كتاب***وتم القران وروحو كاتبينه

انا تراي ابعتبرك من الاقراب***وعلى النقاء تبقى صلتنا متينه

وودع وصارت كلمته تقل مشهاب***اركت على كبدي عراقي مزينه

وبقيت في وضع تحير ابها الاطباب***ايست منه وحالت الياس شينه

واخذت وقت احسب ايماها احساب***وقلبي على شوفه تزايد حنينه

احيان اقول انشد عنه بعض الاصحاب***ويجيك بالعلم الموكد جهينه

واحيان اقول اصبر على جور الاتعاب***ورزق الفتى واجله كتب في جبينه

وسكت ماودي عليه افتح ابواب *** للهرج من ناس ماهم راحمينه

وصبرت مير الصبر طول ولا ثاب*** من طال صبره يالله انك تعينه

ويم ان راشي من طويل الصبر شاب***قررت عنه انشد حدى مجاورينه

نشدت عنه وقال راحو به اجناب*** من قريته شد ونزل بالمدينه

قلت ايه مادام اهله عندنا ايجاب***اما بعيد الفطر والا بحتينه

قال اهله معه ارحلو قلت ياشاب***يعني لازايركم ولا زايرينه

قال ايه مار انسه والايام غراب***تطول وتنسي ضنين ضنينه

قبلي وقبك خلت اصحابنا احزاب***وكم فرقت بين الخدين وخدينه

ماعاد في شوفه طلايب وطلاب***ترى ماعد الا يدرج جنينه

وش تطلبه واحباله بكف قضاب***احذر لاينصب لك زمانك كمينه

قلت الرجال مفتلت روس الاشناب***لاقصى الضروف احسابهم حاسبينه

واقفيت من عنده على الغلب غلاب***اكن غيض القب واجحد ونينه

واعلنت ياسي وانطوت صفحه كتاب *** من البدايه لنهايه حزينه

واقول يالله لاتبارك فالاسباب***الي رمتني بين حبه وبينه